Í bilinum
Tann verkliga royndin í bilinum er týdningarmest; men hollur ástøðiligur kunnleiki er eisini neyðugur, og má tí roynd verða í honum eisini.
Í teirri verkligu royndini skal tú vísa, at tú er førur fyri at koyra bilin á tryggan hátt í øllum vanligum ferðsluviðurskiftum, har royndin verður hildin.
Royndin varir vanliga umleið 45 min. Tú skal koyra eftir teimum ávísingum, maðurin frá Akstovuni gevur. Hesar skulu vera givnar í so góðari tíð, at tú fær tíð at fata og skilja tær og náa at umráða teg og gera tað ávísta. Royndin verður mett sum ein heild, soleiðis at einstakir smærri skeivleikar ikki av sær sjálvum gera, at royndin ikki verður staðin.
Tú verður kunnaður um úrslitið av koyringini beinanvegin. Tey sum ikki standa royndina, fáa at vita, hvørjir skeivleikar ella manglar vóru orsøk til úrslitið.
